 |
| Drs. Ali Nurdin Tanjung |
Ondeh ko mah ajo ha, bilo ajo pulang alah jarang bana ajo pulang kini nampaknyo sibuk bana ajo di Padang tu, sapo kapalo mudo nan baru tibo di lapau Edi, minum kapalo mudo dulu beko wak carito ambo yo lah taragak pulo carito samo palo mah, jawek Pak Udin nan baru pulo taacah ikuanyo di palanta lapau tu.
Buekanlah kapalo mudo tu teh talua Edi, buliah dek samo minum mak samo palo ko, indak wak kopi sajolah, jawek kapalo mudo (palo). Alah samo mandaguik aia Pak Udin samo palo, Pak Udin mandahuluan batanyo samo palo, apo informasi kini di kota wak ko palo salamo 20 hari ambo indak mancogok di kampuang ko doh, kato Pak Udin sambia makan kue lopi.
Ndak ado doh jo, cuma ado cieknyo apo ajo alah baco beritanyo ado di media online, tantang apo tu palo. Alhamdulillah wak baco jo karano mantan Walikota awak Jenius Umar lai dapek peringkat 2 takayo diantaro Walikota se Sumbar dan peringkat 4 takayo dari seluruh walikota dan bupati di Sumbar ko, itu dalam berita tu ambo baco.
Oh baitu palo, yo hebat mantan Walikota wak tu yo palo, yo jo dalam berita tu di jalehan baru manjabek 5 tahun atau 1 priode alah labiah dari 10 milyar kekayaannyo nan tadaftar sacaro resmi di LHKPN (Laporan Kekayaan Pejabat Negara) na indak terdaftar antahlah, antah kok ado pulo nan mandok pitih tu di rekening orang lain itu tantu ndak tau awak doh.
Bara kakayoan Genius Umar mantan walikota awak ko palo, tanyo katik panasaran, labiah 10 milyar katik dan rangking 4 dari 19 kapalo daerah di Sumbar. Lumayan juo tu yo.
Mandanga carito palo tadi urang badarun galak kasadonyo nan duduak di lapau Edi tu, kecek wak tadi dek palo mambaco alhamdulillah kato wak dapek prestasi 2 dalam pembangunan, takicuah di nan tarang wak kironyo salo labai sambia geleng kapalo.
Kok salamo 5 tahun dapek kekayaan 10 Milyar artinyo mantan Wali awak ko tambah kakayoannyo 2 milyar satahun, sambuang labai pertanyaan awak dari ma dapek pitih 2 milyar satahun tu dek mantan wali kota awak ko, paralu wak pertanyakan ?
Kalau baitu patuiklah barabauik apak-apak wak tu ingin mancalon jadi Wali Kota dan malah banyak pulo nan amuah ba abih-abih manjua jo manggadai dan mainjam dan mintak tolong kian kamari untuk bisa tapiliah dan duduak sabagai Wali Kota dan Wakil Wali Kota, nan kito ko marasai kanai ota sajo dan inyo bakameh satelah jadi, salo labai dan urang nan duduak nampak aniang sadonyo dan ado pulo nan babisiak-bisiak sajo.
Takana wakatu ketek-ketek dulu nasehat dari nan tuo-tuo di kampuang, kok sikola waang yo rajin-rajin yo, ma tau nantik ado ratak tangan waang bisa jadi Bupati/Wali Kota, kalau lah jadi panjabek waang jan lupo jo kampuang halaman, bangun kampuang wak ko, buliah bisa pulo sarancak kampuang urang lain tu. Jadi untuak bangun kampuang halamannyo, salo pak Udin sambia bayia balanjo. (***)
