 |
| Drs. Ali Nurdin |
Ikolah urang lapau nan sabana malin yo bana tau di garak, baru ucapan salam wak masuak, nan mak itam ko lah lansuang kocok talua ndak lamo duduak lah talatak teh talua di meja, padohal rencana tadi ka mintak kopi sajonyo, tapi namonyo urang kadai tantu tau di bayang kato sampai, tau jo ereng dengan gendeng, tau jo angin nan basiyuik, tau jo ombak nan ka basabuang, malin bana mak itam tantang itu yo mak itam.
Tanyo Ajo Udin nan baru mandaguik teh talua pad mak itam, indak pulo doh jo Udin sakadar pangatahuan kampuang tantu lai saketek, namonyo wak urang kadaiko bak kato urang, dapek kapuyuak sambia basiang nan banyaknyo urang bacarito wak mandanga dek acok dan lamo tingga juo saketek saketek, jawek mak itam sambia mambalah katupek.
Lapau lah mula rami mungkin karano alah 7.30 pagi, mak itam ko iyo malin bana baa sambungan carito patang jo Udin, tantang apo tu, yo tantang lembaga survei patang, mak itam ko yo tau bana salo si Nal nan sadang makan katupek kok lah rami mode iko urang ado sajo carito nan ka inyo bukak, urang di kadai mandanguih dek galak kasadonyo.
Ko di kambang sasuai lawehnyo mak itam marantang iyo sapanjang banangnyo, wak manusia basifat gawa, Tuhan basifat qadim. Sapanjang nan ambo danga dan ambo caliak baik dari kawan-kawan di lapau dima ambo duduak dan lewat media, dapek disimpulkan Lembaga Survei di Negara awak ko lah ibaraik Sulo Basi, yo bana tajam ateh bawah, makannyo yo bana bataduah, namun karambia ko mandakek juo dek arok badan lai kabasiah ndak rancak di pandang urang ndak sadar lai kulik nan tabukak, kukuran siap pulo di panantian.
Jadi baa mukasuiknyo tu mak Udin salo si lih ka bangke ajo udin. Kalau lembaga survei dulu yo sabana rancak dan bermanfa'at bagi masyarakat tentang arah kekuatan para calon, tapi kini ndak baitu doh lai, lah banyak sasuai jo pasanan dan ado pulo nan karajo samo samo lembaga survei upamonyo ado 5 lembaga survei menampilkan data nan samo, artinyo ka 5 lembaga survei alah di kontrak oleh urang/kelompok itu.
Jadi hasil survei nan di tayang berbagai TV tu ndak bisa di picayo lai tu yo mak udin, kasanyo baitu tapi satidaknyo di ragukan. Nah ado ciek lai kemungkinannyo, kalau yang mamasan lembaga survei itu warnanyo putiah, mako hasil survei tu nan kalua adolah kekuatannyo ado pado warna putiah. Kesimpulannyo dek hari alah tinggi pulo pokoknyo Lembaga Survei ibarat kato samo jo Ula, makannyo sakali 5 th ko dan kanyang sampai pemilu nan akan datang.
Maaf itu dulu yo ota awak ambo dek ka pai ke padang pulo pagi ko, alah masam pulo baju kumuah dalam jok honda tu, iko carito lapau palamakan minum sajo, kok ado nan talantuang ka naik, tasingguang dek ka turun minta maaf ambo tantang itu, jan ka jadi janjang batu handaknyo, ajo udin tagak setelah bayia balanjo kasodonyo. (***)
