Hot Widget

Type Here to Get Search Results !

Mancaleg Urang Mancaleg Awak, Celoteh Ajo Ali Nurdin

Ali Nurdin 

Sia tadi Mak Itam nan baru pai tadi. Oh itu kanakan wak juo mah, dima inyo salomoko, salo Ajo Udin. 

Salomoko inyo lai di wilayah Sumbar ko juo, oh tu kini alah ka di kampuang bana inyo lai tu, eh nampaknyo iyo, jawek Mak Itam sambia mambuek kopi, palanta alah panuah kasadonyo.

Tadi tanyo Ajo Udin bajawek tasambia sajo baru, dek sadang karajo, nan subananyo paja nan pai tadi tu adolah anak pisang awak di siko yaitu anak nan paliang tuo dek maniangko si Amaik, nan si Amaik ko kan bininyo urang Cubadak. 

Jadi nan pajako kini sato pulo mancaleg dapek nomor urut 3, apo partainyo Mak Itam, itu nan alun jaleh lai bisuak inyo kamari baliak langsuang bawo atribut apo keceknyo ndak mangarati lo den doh.

Iko nan marumeh paruik awak mancaliak anak ko, dek inyo mambako di siko tantu inyo alah samo jo anak awak, baa marumeh Mak Itam, tanyo jo Udin. 

Nan paja ko nampaknyo urang sato mancaleg inyo sato pulo, tapi bantuak indak ba modal, masak wak mancaleg duduak di lapau kopinyo inyo sajo urang mambalian, nah itu bukan di siko sajo di lapau lain baitu juo kabanyo.

Oh kok baitu iyo payah tumah Mak Itam, pergaulan salomoko indak pulo rancak dan banyak di kampuang ko, mungkin karano jarang pulang bisa jadi juo. 

Sudah tu takah itu pulo urang dilagak jo carito dan janji sajo, iyo ndak masuak tu doh Mak Itam, kok takah itu sia pulo agaknyo nan mamiliah inyo tu, salo Aciak nan duduak di ujuang palanta, nan lain nampak galak mangkacemuih.

Kok baitu baa Mak Itam dek baliau ko anak awak juo, Mak Itam ajakan caro bakawan ala kampuang, alah den asah patang kebetulan inyo kamari lapau lai sadang langang. 

Di kampuang ko caro bakawan babagai caronyo apolagi waang nan sadang butuh bantuan suaro kini, urang ko kadang banyak ma uji waang, itu contohnyo minum waang di tasasak kawan mambayiaan, itu inyo mauji waang sabananyo, baa respon waang, saharunyo capek waang ambia aliah, waang nan mambayiaan itu bukti awal bagi urang tando waang lai mangarati.

Tapi antah baa ko lah, antah pajako indak ba modal, atau dasar panceke atau indak pandai caro bakawan itu nan marumeh paruik den mancaliaknyo, indak juo barubah doh, nan den takuikan kok jadi cemeeh anak di kampuang lai.  

Kok baitu yo ndak masuak tu doh Mak Itam, timpo Ajo Udin, masak inyo nio buah nan lamak, pinggalan urang mambawokan, urang pulo manunjakan lah jatuah buah inyo pulo makan daulu pado urang lain. 

Itu namonyo karandak basa hormat kurang, salero tinggi saku bajaik, aspal angek tarompa bajinjiang, hujan labek payuang bakapik. 

Kama juo pai indak masuak etongan tu doh, tibo di kayu lurus indak bisa diambiak ka alu, bungkuaknyo ndak cocok ka pasangan, ketek ndak bisa ka ulu pisau, cocoknyo hanyo ka kayu api tu nyo Mak Itam. (***)

Posting Komentar

0 Komentar
* Please Don't Spam Here. All the Comments are Reviewed by Admin.

Below Post Ad

Hollywood Movies