 |
| Ali Nurdin Tanjuang |
Hampir setiap pagi lapau Anjang rami didatangi orang. Banyak nan sasuai gulai lontongnyo nampak jo salero urang. Anehnyo sajak siap shalat Subuah pagi kadai tu alah rami samo ibuk-ibuk siap shalat subuah masih lengkap dengan warna-warni mukenahnyo/talakuang alah tagak berjejer manunggu giliran pesanannyo masiang-masiang, karano di lapau sarapan pagi Anjang ko ado tigo macam gulai lontong satiok hari dan ado pulo picalnyo.
Nan apak-apak nampak alah banyak pulo nan duduak di kursi, malah ado nan sadang makan lontong sambia maota, babagai tadanga ota dari apak-apak ko, malah banyak kini nampaknyo nan bacarito politik.
Kok mandanga carito apak nan duduak di lapau tu, kayaknyo alah banyak tapangaruah dek banyak nonton berita di TV dan Youtube pulo. Wakatu Pak Zal dan Pak Udin bacarito, Anjang sambia lewat manyolo, ambo yakin pemilu bisuak ko labiah akan curang dari pado 2024 nantik, baa pandapek Pak Zal samo Pak Udin gak ati tu.
"Ndak baitu doh, Anjang dek lamak caritoko, kok lontong kami dek abih pulo buekkanlah kami kopi dulu," solo Pak Udin dek lamak carito ko, dek alah tinggi pulo antene Anjang nampaknyo kiniko mah.
Iko yo badantang kopi Anjang mah, harumnyo dan rasonyo yo sadang elok, salo Pak Udin sambia mangacau kopi.
Ambo cubo jawek pandapek Anjang tadi saketek, salo Pak Zal sambia mangunyah bawan. Kok mancaliak stuasi kini nampaknyo mungkin karano salamoko ambo tau iko pulolah baru nan Presiden wak nan ikuik cawe-cawe, kasanyo ikuik interpensi untuk manunjuak sia nan ka calon panggantinyo nantik.
Biasonyo nan taralah wak caliak Presiden tu hanyo sebagai wasit sajonyo, iko kini nampaknyo alah sato main bola pulo. Jadi ibarat batandiang bola ndak pakai wasit lai baa kiro-kiro kajadiannyo nanti tu, antahlah.
Abih Pak Zal mangecek disambuang pulo samo Pak Udin, kok mancaliak garak jo garik condongyo iyo ka curang nampaknyo nantik, karano inyo bisa perintahkan semua mentri, gubernur, bupati dan Wali Kota seluruh daerah untuk mendukung pilihannyo tamasuak instansi lainnyo.
Tapi sungguah baitu kalau wak simak dari berita dari media baiak TV, radio dan mendsos lainnyo, karajo Presiden nan cawe-cawe tu masyarakat alah tau pulo bahwa itu indak patuik di lakukan oleh Preseiden nan masih di gaji oleh rakyatko.
Jadi masyarakat alah banyak nan banci pulo mancaliak parangainyo tu, kok masyarakat alah bosan mancaliaknyo tantu masyarakat banyak ko nantik akan ikut mengawasi, asal Polri dan TNI netral, kecurangan sulik juo akan terjadi.
Manyalo pulo saketek kecek mamak nan jauah duduak di meja balakang, sabananyo pak Jokowi alah mancaliakan ke kito rakyatko sifat aslinyo nan salamo ko masih tatuik awan dan paga beton nan inyo bangun, tapi kini Tuhan alah mancaliakkan parangai inyo nan sabananyo indak malalui urang lain gai doh. Inyo sendiri nan mambukakan kelakuannyo kepada rakyat banyak ko, nampak kini kan alah banyak urang menghujatnyo karano parangai inyo surang.
Ndak baitu doh, salo Pak Zal. Wak sarahan sajolah ka urang-urang nan cadiak di pusat tu lai untuang kok lai banyak juo nan punyo hati nurani, eboh wak siko ndak juo ado tadanga dek inyo tudoh hari alah jam 8 pulo, lontong Anjang alah abih, pulang wak lai bisuak wak sambuang baliak yo.
Pak Zal langsung mangaruak saku, alah disubarangannyo pulo nan duduak sameja sakali.
"Eh baa ko, ka mancalek pulo Pak Zal dek baborong bana sadonyo," kato Pak Udin, sambia galak Pak Zal langsung pulang. (***)
