Hot Widget

Type Here to Get Search Results !

Deploper Bauntuang, Masyarakat Buntuang, Celoteh Ajo Ali Nurdin

Ali Nurdin 

Assalamualaikum, ondeh yo alah bantuak kabaralek gadang kampuang wak nampaknyo, kok sapanjang jalan alah panuah dek baliho, dindiang lapau lah panuah pulo samo kalender warna - warni dindiang alah dihiasi dek foto para caleg baik bentuk kalender (almanak) maupun foto masiang caleg dan capres.

Kopi lah ciek dulu rang kadai dek tabukak carito ko saketek, yo jo Udin panuah atau satangah ko jo, satangah sajolah kopi talatak jo Udin balangsuang balewa ka urang banyak nan duduak, baa koa minum wak sadonyo, indak basabuik namo, indak basubuik gala doh, pokoknyo sado nan disungkuik atok nan dilingkuang bandua.

Baa itu kopi di daguik dan lah di patiak rokok dek ajo Udin, si Tamar langsuang bantanyo, sumarak kampuang yo lai mah kini mak babarih baliho dan batabua kalender bagalentongan spanduk, tapi lah banyak nan lengah, lah banyak takicuah wak dek cadiak, tajajah wak dek nan kuaik/kuaso, eh baa kok baitu kecek waang Tamar.

Alun dapek kaba Ajo Udin lai atau mungkin Ajo alah mandanga juo mungkin karano alah masuak ka media online nampak dek ambo, tantang apo tu Tamar cubolah caritoan nak jaleh dek wak nan basamo ko, tumah masaalah perumahan nan talatak di Dusun Garinggiang tu, nan dibangun dek PT. Bukit Menara Perkasa punyo jo Bakrie (Kadepok) anggota DPRD Kota Piaman tu, antah baa daulunyo ndak tau pulo awak, kini nan jaleh aia limbah yaitu mandi dan cuci dunsanak wak di perumahan tu kalau hari paneh yo bana taganang dan babaun dan manjadi sarang nyamuak. Dan Indak sehat untuak masyarakat dakek situ dan tamasuak urang tingga di perumahan tu sendiri.

Antah dek manenggang urang perumahan salamoko, babuekan pulo bandanyo di tangah jalan dan dialirkan ka lurah dunsanak Ajo Eri, sahinggonyo ado 6 buah sumua aia minum nan ado sapanjang lurah kini alah tercemar 3 diantaronyo ndak bisa di pakai doh lai. 

Karano aia tu alah babaun busuak, yaitu sumua Elok Banun, sumua Teta dan Surau Sakinah, kini tapaso pakai aia pansimas lai dek baun busuak tu.

Nampaknyo kini kaum Ajo Eri dek alah sekian tahun alah abih pulo kesabarannyo nampaknyo rencananyo tadanga ka di beton nyo lai untuak paambek aia jan masuak ka lurahnyo tu. 

Tantu alamaiknyo kataganang aia sapanjang jalan dan di perumahan tu, pandapek ambo memang alah patuik pulo babuek sarupo itu karano samakin bahayo dampaknyo kalau di padian karano rumah tu kini alah panuah di tempati oleh pemiliknyo.

Oh baitu, kok itu yo ndak bisa di diamkan tu doh lai, kok bisa wak tuntuik Barie (Kadepok) ko, kalau iko dicarikan capek jalan kaluanyo basamo - samo handaknyo. 

Harapan wak tantu Kadepok sebagai anggota dewan dan kini mancaleg pulo baliak dari Partai Golkar, harusnyo capek inyo turun untuak basamo cari solusinyo, supayo kesannyo anggota dewan tu indak balanteh angan atau lai peduli kapado masyarakat apolagi Desa Kotomarapak tamasuak Dapilnyo pulo.

Mandanga carito tu, urang di lapau satuju untuk mendesak Kadepok agar bisa datang ke Desa Kotomarapak untuk kusuik kamanyalasai, karuah nan kamanjanihan, tantu di kito kini ingin mancaliak niat baiak dari kadepok ko, lai ado apo indaknyo, satuju kito tumah jo yo baitu handaknyo. (***)

Posting Komentar

0 Komentar
* Please Don't Spam Here. All the Comments are Reviewed by Admin.

Below Post Ad

Hollywood Movies